Հարմարավետ միջավայրը ստեղծում ենք միասին

Բժշկական կենտրոնում յուրաքանչյուր այցելու պետք է իրեն զգա հանգիստ, ապահով և հարգված։ Այդ միջավայրը ձևավորվում է ոչ միայն բուժանձնակազմի աշխատանքով, այլև մեր բոլորի վերաբերմունքով և վարքագծով։

Ահա մի քանի պարզ սկզբունք, որոնք օգնում են պահպանել փոխադարձ հարգանքի և հարմարավետության մթնոլորտը։

👕 Ընտրեք միջավայրին համապատասխան հագուստ

Բժշկական կենտրոնը հանրային և մասնագիտական միջավայր է, ուստի այցելության համար խորհուրդ ենք տալիս ընտրել կոկիկ, հարմար և միջավայրին համապատասխան հագուստ։

Խնդրում ենք հնարավորության դեպքում խուսափել լողափնյա կամ տնային հագուստից, չափազանց կարճ շորտերից և հողաթափերից։

📱 Պահպանեք հանգիստ միջավայր

Սպասասրահներում և միջանցքներում խնդրում ենք հեռախոսով խոսել ցածր ձայնով, իսկ տեսանյութեր կամ երաժշտություն դիտելիս օգտագործել ականջակալներ։

Հիշենք, որ մեր կողքին կարող են լինել մարդիկ, որոնք այդ պահին անհանգստացած են, վատառողջ կամ պարզապես հանգստի կարիք ունեն։

⏱ Հարգենք միմյանց ժամանակը

Խնդրում ենք կենտրոն ներկայանալ նշանակված ժամից 15 րոպե շուտ և հետևել կենտրոնում գործող հերթագրման կարգին։

Եթե չեք կարող ներկայանալ նշանակված այցին, խնդրում ենք նախապես տեղեկացնել մեզ․ այդպես ազատված ժամանակը հնարավոր կլինի տրամադրել մեկ այլ պացիենտի։

🤝 Հարգենք անձնական տարածքը

Բժշկական տեղեկատվությունը անձնական է։ Խնդրում ենք հարգել մյուս այցելուների անձնական տարածքը և զերծ մնալ նրանց զրույցները, բժշկական փաստաթղթերը կամ էկրաններին երևացող տեղեկությունները դիտելուց։

Խնդրում ենք նաև առանց թույլտվության չլուսանկարել և չտեսանկարահանել այլ այցելուների կամ բուժանձնակազմի անդամների։

👨‍👩‍👧 Ուղեկցողներ

Եթե դրա անհրաժեշտությունը չկա, ցանկալի է բժշկական կենտրոն ներկայանալ առանց մեծ թվով ուղեկցողների։ Դա օգնում է պահպանել սպասասրահների հանգիստ և ազատ միջավայրը։

Երեխաների հետ այցելելիս խնդրում ենք հետևել նրանց անվտանգությանը և հնարավորության սահմաններում պահպանել հանգիստ միջավայրը։

💙 Փոխադարձ հարգանքը՝ ամենակարևոր կանոնը

Բժշկական կենտրոնում կարող են հանդիպել տարբեր տարիքի, տարբեր առողջական վիճակում և տարբեր կարիքներով մարդիկ։

Հարգալից հաղորդակցությունը, զսպված վարքագիծը և շրջապատի նկատմամբ ուշադրությունը փոքր քայլեր են, որոնք բոլորիս այցը դարձնում են ավելի հարմարավետ։

Շնորհակալ ենք, որ օգնում եք «Վարդանանց»-ում պահպանել հարգալից, հանգիստ և հոգատար միջավայր։